Unai Azkaratek, Aitor Aranburuk, John Prietok, Aitzol Prietok eta Bittor Giralek osatzen duten Axkaiter Pelox taldeak kontzertua eskainiko du zapatuan San Juan auzoko ermitan, 19:00etan. Bertan hasiko dute Irish Gigs 2020 bira, eta, hain zuzen ere, "leku berezia" da Azkaiter Pelox boskotearentzat: "Iaz, lehen aldiz izan ginen ermitan jotzen eta esperientzia polita izan zen. Auzotarrek oso ondo hartu gintuzten eta jende ugari bertaratu zen. Ermitan jotzeak ere badu bere xarma eta ordura arte egin gabeko zerbait zen, oso ondo egon zen". Haiekin batera arituko da taula gainean Shane Curley, bere ahots eta gitarra akustikoarekin.
St. Patrick ospatuz
Martxoaren 17an ospatzen den St. Patrick eguna aitzakia hartuta abiatu dute Irish Gigs 2020 bira, eta, hain zuzen, irlandar doinuak egongo dira entzungai zapatuan ere: "Gure kontzertuetan beti jotzen ditugu irlandar doinuak, baina oraingoan, bereziki landuko ditugu, Shane Curleyren laguntzarekin". Hala, biolarekin eta biolinarekin arituko da John Prieto, perkusioan Aitor Aranburu, baxuan Aitzol Mujika eta saxofoian, berriz, Bittor Giral.
Kontzertu ugari
Era berean, martxoaren 15ean Tolosan arituko dira kontzertua eskaintzen, eta, oraindik guztiz zehazteke dituzten arren, emanaldi gehiago egongo direla iragarri dute. Dagoeneko ohitura den modura, St. Patrick egunean Bergarako Irish tabernan egongo direla azaldu dute, herrikide dituzten Arragoa taldeko kideekin batera.