Gipuzkoako Topaketa Sozialistak lehenbiziko aldiz eramango dituzte aurrera egunotan. Bergaran egingo dituzte; zehazki, bihar eta etzi – egubakoitzean eta zapatuan–. Iaz sortu zen Gazte Koordinadora Sozialista gazte antolakundeak antolatuta, "jendarte sozialista" baten aldeko apustua egin gura izan dute, taldeko kide Aitor Kortabarriak azaldu moduan.
Hiru dira topaketa honen helburu nagusiak: batetik, gaur egungo testuinguru politikoa aztertu eta "etorkizuneko erronkak" finkatzea. Bestetik, "jendarte politizatu" bat sortzeko jendea elkartzea; eta era horretan, eskualde ezberdinetako kideak ezagutu eta elkarren arteko harremanak sortzea.
"Gazte langileei" zuzenduta
Euskal Herriko "gazte langileei" zuzenduta antolatu dute topaketa, baina "interesa" duen edonori luzatu nahi diote parte hartzeko gonbidapena: "Sektore desberdinetako jendea elkartzea gurako genuke eta", azaldu du.
Bihar arratsaldeko 17:30ean ekingo diote topaketari; eta harrera ekitaldia egingo dute. Horren ostean hitzaldia egongo da, eta egunari amaiera emateko afalostean kontzertua egongo da Kartzela Zaharrean. Gaua pasatzeko aukera ere badagoela azaldu du Kortabarriak: "Aranzadi Ikastolako gimnasioan egokituko ditugu lo egiteko tokia eta dutxak. Leku berean otorduak egiteko txartel bat jarriko dute salgai, 10 eurotan. Zapatuan, berriz, goizeko 10etan hasita hitzaldiak egongo dira, eta 19:30ean manifestazioa egingo dute Gazte Langileok Euskal Estatu Sozialista lelopean. Kontzertuekin itxiko dute Gipuzkoako lehen Topaketa Sozialista.
Egitarau osoa
Egubakoitza:
- 17:30 Harrera
- 18:30 Proletarizazioa eta antolakuntza forma berriak, Seminarixoan
- 21:00 Afaria
- 22:00 Kontzertua Kartzela Zaharrean
Zapatua:
- 9:00 Gosaria
- 10:00 Etorkizunari heltzeko moduez, Zabalotegi aretoan
- 14:00 Bazkaria
- 16:00 Ekoizpen artistiko sozialista, UNEDen
- 16:00 Langile kontrolpeko espazioak, Kartzela Zaharrean
- 16:00 Kultura militanteaz hausnartzen, Zabalotegi aretoan
- 19:30 Manifestazioa Gazte langileok Euskal Estatu Sozialista leloarekin
- 21:00 Afaria
- 22:00 Kontzertuak, Kartzela Zaharrean:
- Habemus Papam
- Criminal Remains
- DJak
