San Valentin egunaren kontra, musika nagusi gaur Kartzela Zaharrean

Maitasun erromantikoak eta kontsumismoak eskaintzen duten eredua gainditzeko, musika doinuak izango dira nagusi gaur, hilak 14, Kartzela zaharrean. Bertan arituko dira Nizuri Tazuneri taldea, Gual.icho DJa eta Turtukiñak.

Lagun talde baten egitasmotik sortua, "dantzarako, gerriak astintzeko eta izerditzeko" aukera izango da Kartzela Zaharrean gaur, San Valentin egunez. Hain zuzen ere, egun horrek plazaratu duen eredua "irauli" eta "azken batean kontrolerako tresna den maitasun erromantikoa eta eredu kontsumista alde batera uztea" du helburu gaur egingo den Anti SanBalentin gaualdiak.

Egitarau oparoa

Gaualdia girotzeko, hainbat artistaren emanaldiak prestatu dituzte: 22:30ean hasita Nizuri Tazuneri taldeak kontzertua eskainiko du. Norzzone eta Fani Donostialdetik etorritako abeslariek, Hawa eta Maisha Barakaldoko produktoreekin batera, elkarlanean sortutako proiektu honek euskarazko rapa aldarrikatu gura du: "Euskarazko rapak txinera dirudiela esaten ziguten askok, eta guk, ordea, ezetz, japoniera kutsu gehiago zuela; hala jaio zen Japanesence izeneko lehen maketa, 2014an".

Gual.icho DJa

Duela zazpi urtetik Bergaran bizi den Gual.icho DJ uruguaitarrak ere giro aparta jarriko du Kartzela Zaharrean, 00:30etik 04:00etara. Musika afro-tropikal giroan murgilduta ibili da orain arte, proiektu ezberdinetan, Nacho A. Ifran DJa. Egun, ordea, bestelako musika ilunago eta elektronikoei heldu nahian, egitasmo berri honekin lanean hasi da, "dantzalekuan latino/afroaren berotasun eta organikotasuna alboratu gabe". Otsailaren 14ra begira saio berezia prestatuko du.

Turtukiñek, saioa prest

Turtukiñen txanda iritsiko da ostean. Mundu osoko musika eta erritmo dantzagarriak jarriko dituzte; nagusiki, emakumeek sortuak. Oraingo honetan ere, saio berezia prestatu dute, filtrorik jarri gabe

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira.

TELEGRAM: Batu zaitez @GoienaAlbisteak kanalera.