Bergarako Udal Gobernuak, merkataritza sektorea jasaten ari den "aldaketa nabarmenekiko kezka handia" duela-eta, diagnostiko bat egiten dabil: "Erosketa ohiturak asko aldatu dira, eta horren aurrean hurbileko merkataritza indartzea eta sendotzea nahi dugu".
Telefono bidezko inkestak
Testuinguru horretan eta Bergarako zein inguruko herrietako hainbat bizilagunei kontsumo elkarrizketak egin ostean, gaurtik hasita aipatutako enpresek Bergarako merkataritza eta zerbitzuetako profesionalei telefono bidezko inkestak egingo dizkiete: "Inkesta horietan sakonduko da negozioen profilean, bilakaeran, egindako inbertsio edo hobekuntzatan, online jarreran, bezeroen ezaugarritzean eta kudeaketa moduan, besteak beste".
Horrez gain, profesionalei ere galdetuko zaie honako gaiez: merkataritza-elkartegintza, Bergarak bisitari edo bezero potentzialei begira dituen erakargarritasun eta oztopoak, aparkalekuaren gaia, azoka, turismoa eta beste.
