Emaitza "onak" lortu zituzten Bergarako saskibaloi taldeek pasa den asteburuan. Hain zuzen, Bergarako taldeek jokatu zituzten hamar partiduetatik zortzi irabazi zituzten eta bi galdu.
Gizonezko seniorrek liderraren aurka irabazi zuten puntu bakarreko aldearekin eta laugarren postuan kokatu dira. Taldeko ordezkariek adierazi dutenez: "Partida oso bizia izan zen; azken segundoan hiruko bati esker irabazi genuen". Denboraldian jokatu dituzten zazpi partiduetatik, bi galdu dituzte, eta hirugarren sailkatuak beste puntu dituzte une honetan.
Emakumezko seniorrek, berriz, bi puntuko aldearekin irabazi zioten Saski Axular taldeari. "Lehia handiko" partida izan zen, eta momentuz taldea "ondo" hasi dela adierazi dute, lau partidutatik hiru irabazita.
Asteburuan, hitzordu ugari
Asteburu honetan hamar partidu jokatuko dituzte Bergarako saskibaloi taldeek; lau etxean. Gizonezko seniorrek puntu kopuru bera duen Alde Zaharra taldea hartuko dute etxean gaur, 20:30ean, Labegaraietan.