Ziklismorako zaletasuna sortzeko lehen urratsak ematen

Lokatza ziklismo eskolak antolatutako bizikleta festa benetako jaia izan zen. Ehun neska-mutikotik gertu batu ziren atzo Bergaran: "Berriztik ere etorri ziren, sare sozialei esker mezua zabaldu eta gero", dio Jon Unamunok. "Izan ere, halako ekimenak lagungarriak dira gaztetxoek txirrindularitzarekiko zaletasuna izan dezaten".

Lokatzak erakutsi zuen atzo Bergaran txirrindularitzarako zaletasuna egon badagoela, baina landu beharreko soroa dela hori ere. Baratze horretako fruitu diren Mikel Aristi eta Julen Irizar ziklista profesionalak ere izan ziren jaian. Dagoeneko Euskadi Fundazioak egin du publiko 2020ko denboraldian ze txirrindulari izango dituen, eta bertan izango dira bi bergararrak, laranjaz jantzita. Atzokoa, baina, elastiko urdina janzteko eguna izan zen, Lokatzakoek oparitutako kamisetak janztekoa: "Alde horretatik, eskerrak eman gura dizkiegu Bolintxo eta Lana babesleei".

Hala, seminarioko patioan zirkuitua egin eta 17:00etan hasita lasterketak antolatu zituzten gaztetxoendako: "Jaio giroa bai, baina gazte batek baino gehiagok seriotasun handiz hartu zituen lasterketok, han ez zuen gura inork galtzerik! Ederto ibili ziren gazteak, oso gustura geratu gara hitzorduak emandakoarekin".

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.