Sergio Ruiz Serge gustura da atzoko emanaldiak emandakoarekin. "Diskoa kaleratu nuenetik zuzeneko kontzertu batzuk egin ditut dagoeneko, eta giro polita izan genuen atzo Bergarako Bule tabernan ere", adierazi du. Bakarkako lehen lana du eta biluzik moduan sentitzen dela aitortzen du. "Baina horren bila nenbilen eta alde horretatik gustura nago".
Musika akustiko modernoa edo garaikidea egiten du pop eta folk ukituekin. Sentikor ageri da Serge bilduma horretan. Haurtzaroan zein nerabezaroan ikaskide izan zuen Gari Berasaluzeren poemak musikatzen ditu Enarak itzuli dira diskoan.
Kontzertuak eskaintzen jarraitzea aurreikusten du. Arrasaten emanaldia egindakoa da, eta Aretxabaletan eta Eskoriatzan ere jo nahiko luke. Badihardu datak lotzeko ahaleginean.