Ganadua, askotariko postuak eta 1.200 pintxo Elosuko ferian

Aurten ere labeldun txahala erreko dute; 1.200 pintxo aterako dituzte, bi eurotan bakoitza.

Zapatuan, urriak 12, Elosuko 41. mendi ganadu feria ospatuko dute. "Eguraldiak laguntzen badu, 2.000 eta 3.000 lagun artean izan ohi dira auzora bisita egiten dutenak eta lanean 80 lagundik gora jarduten gera dena ondo joan dadin", dio auzo alkate Iñigo Zubeldiak. Haur, gazte eta helduendako askotariko ekintzak izango dituzte; aurten hirugarren urtez jarrian, Aitzerra baserriko labeldun txahala erreko dute, 1.200 bat pintxoa ateratzeko.

Esandako moduan, hirugarren urtez jarraian bertako labeldun txahala erreko da. Aurten Aitzerra baserrian hazitako txahala izango da erreko dutena;  iaz Agerreko Balentinenaren baserrikoa izan zen eta 2017an Bentaosteko baserriko Marijoserena. Harrera ona izaten du; aurten ere 1.200 pintxo inguru ateratzea espero dute, eta pintxo bakoitza bi eurotan salduko dute. Erretzailea Karlos Ibarrondo elorrioarra izango da aurten ere, aurreko egunean, 22:00ak aldera, hasiko da lanean eguerdirako txahala eskaini ahal izateko.

Ohiko postuak

Plazan urtero antzera etorriko dira artisauak eta genero saltzaileak; ogi, gozogile, gazta, ezti, perretxiko eta askotariko elikagaiak batuko dira plazan, eta beheko zelaian bestelako postuak egongo dira. Umeendako puzgarriak ere izango dira.

Diru-laguntza nahikorik ez

Auzo alkatearen arabera, Udalaren partetik jasotako diru laguntza ez da nahikoa izango. "Aparkalekuak, postuek eta eskaintzen ditugun mokaduek osatzen dute gure finantziazioa. Gaur egungo feriaren kostua 12.000 euro ingurukoa da". 

Erlazionatuak

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.