A Contrablues taldea Europa mailako banda onenetakoa da; blues musikari dagokionez, behintzat. Horren erakusle da 2014ko European Blues Challenge-n lortu zuten garaikurra. Hala, euren musikaz gozatzeko aukera egongo da, Berumuga zikloaren barruan, gaur, barikua, 22:00etan.
Orain dela 12 urte hasi zuten musika ibilbidea, eta, ordutik, zazpiehundik gora emanaldi egin eta sei lan diskografiko argitaratu dituzte. Bartzelonako kaleetan hasi ziren jotzen, eta handik beste hainbat agertokitara egin dute salto.
Heart and guts euren seigarren lana aurkeztera etorriko dira Espoloira
Europako jaialdi handienetan izan dira. Heart and guts euren seigarren lana aurkeztera etorriko dira Espoloira. Bizitasuna, ausardia eta konpromisoa erakutsi dute, beste behin ere, lan berriarekin. Hamabi kantu jasotzen ditu diskoak: beldurrik eta lotura estilistikorik gabe sortuak. Taula gainean izango dira Alberto Noel, Hector Martin, Joan Vigo, Nuria Perich eta Jonathan Herrero taldekideak.