Bigarren edizioa du aurtengoa udako futbol kanpusak eta balorazio "positiboa" egin du Bergara kirol elkarteko lehendakari Iosu Elorzak: "Erantzun ona izan du eta haurrak gustura dabiltza. Lehen aste honetan 120 bat neska-mutiko ari dira parte hartzen eta datorren astean 40 bat izango dira. Batzuk errepikatu eta bi astez ere egongo dira kanpusean".
Goizeko 9:00etan hasita eta 13:00a bitarte, futbolarekin erlazionatutako ekintza ugari egiteko aukera izango dute haurrek: teknika hobetzeko ariketak, partiduak, txapelketa txiki bat, baita irteerak ere. Horretaz gain, Jose Javier Barkeroren bisita ere izan dute eta berarekin solasean aritu eta bere esperientzia ezagutzeko aukera izan dute.
