Maiatzean zehar erromeria ugari egiteko ohitura zegoen garai batean Bergaran. Tradizio hura berreskuratu eta herria dantzara animatzeko asmotan, jaialdi berezia egin dute gaurkoan herriko euskal dantza taldeek. Hala, eguzkia lagun, San Martin plazan batu dira musika eskolako dantza taldea, Janire Urbietaren taldea, Xamatz-eko kideak, Moises Aspiazu dantza taldea eta Bergarako erraldoi taldeko kideak.
Hiru zatitan bereizi nahi izan dute ekitaldia; lehenik, dantza taldeek eta erraldoiek egin dute dantza, nork bere aldetik. Gero, dantza herrikoi batzuk egin dituzte, denek elkarrekin, eta azkenik, erromeria kutsukoak dantzatu dituzte, herritarrei batzeko aukera eskainiz.
