Bergaratik San Juan auzora doan errepidea “hobetzea” EAJren “lehentasunezko helburua” dela esan du Elena Letek: "GI-627ra sarbide nahiko erraza badute ere, beharrezkotzat hartzen dugu errepidearen trazatua eta profila zuzentzea, tamaina handiko garraioak ez dezan izan gaur egun dituen zailtasunak gehiegizko peraltea edo aldapagatik”. Alkategaiak gaineratu du badagoela “bereziki kurba bat, Zabaleta parean, bolumen eta zama handiko garraioari buruhaustea sortzen diona”.
Zehaztasunekin jarraituz azaldu du “konplexutasun handia” duen proiektu bat dela. Gaur proposatu duten obraren diseinuak "trafikoa txandaka antolatuta” izatea eskatuko du, "Amillagako industrialdetik datorren trafika moztu behar izan gabe”. Industria jarduerarako ez ezik, inguruko baserrietan bizi direnen "mesederako" ere izango dela nabarmendu du Letek, "bai Uberak eta bai San Juan auzoak sarbide erosoagoa eta seguruagoa” izango dutelarik.
Era berean, Bergarako alkategaiak azpimarratu du "San Juan, Aribar eta Larramendiko industrialdean 200.000 m2 daudela eraikita, eta oraindik ere aukera dagoela enpresa berriak bertara joateko, batez ere Larramendin”.
