Estreinaldi berezia Kartzela zaharrean, maiatzaren 19an

Maiatzaren 19a egun berezia izango da Kartzela zaharreko Dynamo zineklubarentzat, zortzigarren ziegan estreinaldi interesgarria izango dute-eta. Izan ere, Katilhotsak kultura elkartearen Napardeath filma ikusteko aukera izango da 18 lagunendako lekua duen aretoan. Hiru emanaldi egingo dira arratsaldean zehar eta ondoren, 20:00etan, solasaldia egingo dute filmaren egileekin.

Napardeath (Ataun Of The Dead III) filma orain egun gutxi estreinatu da Donostiako antzoki zaharrean, eta oso emanaldi gutxi egongo dira uda aurretik.Filmeko eszena batzuk Kartzela Zaharrean grabatu ziren, eta horregatik datoz filma aurkeztera. Zuzendariak ere bertan izango dira.

Filmaren grabaketak, Kartzela zaharreko ziega baten.

Zumalakarregi vs. Antso Azkarra

Hala dio sinopsiak: "Lehenengo filmean berpiztu eta bigarrenean Eusko Alderdi Banpiroa garaitu ondoren, Zumalakarregi zonbia Iruñera abiatuko da bere burua euskaldunen errege izendatzeko asmoz. Bidea ez da uste bezain erraza izango ordea, Ezker Abertzaleak Antso Azkarra momia berpiztuko baitu, nafar erresuma berrezarri eta tronua berreskuratzeko asmoz. Nor izango da garaile tronua lortzeko dema honetan?".

Esandako moduan, hiru emanaldi egingo dira, nagusia eta izenik eman beharrik gabekoa 19:00etan izango da.

16:00 - Aurre emanaldia I Zineklubeko ziegan*
17:30 - Aurre emanaldia II Zineklubeko ziegan*
19:00 - Emanaldi nagusia (Izen emate gabe - irekia)
20:00 - Solasaldia filmaren egileekin

* Bi saio horietako aforoa 18 pertsonakoa da; izen ematea Kartzela Zaharrean, maiatzaren 17an, 22:15ean.