Entzuteko eta ikasteko kontzertu aproposa

Haur eta gazteei zuzendutako kontzertua egin du gaur, eguerdian, Musika Bandak Udal Pilotalekuan, Musika Eskolaren Apirilean musika ekimenaren baitan. Enrike Txurruka bandako zuzendariordeak zuzendu du eta Igor Larrañagak aurkeztu du gaurko emanaldia.

Ez-ohiko kontzertua izan da musikarientzako, errepertorioari eta jotzeko moduari begiratuta: haurrek ezagutzen eta gustuko dituzten kantuak eskaini dituzte, kantuen artean azalpenak emanez, eta pieza batzuk jotzen zituzten bitartean, jarlekuetan beharrean, ikusle gazteak alboan zituztela; amaitutakoan, musika tresnak probatzeko aukera ere izan dute. "Ondo joan da emanaldia, ikusle gazteek parte hartzeko modukoa egin gura genuen, eta halaxe egin dugu. Horren ezagunak ez diren tresnak nabarmendu gura izan ditugu gaur, fagota, bonbardinoa eta tuba, esaterako.Taularen gainera igotzeko gonbidapena ere egin diegu, musikarien artean jarrita, nola entzuten den probatzeko; horrez gainera, kantuan eta dantzan ere ibili dira Belarriprest eta Ahobizi pertsonaiekin", azaldu du Enrike Txurruka zuzendariordeak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.