"Tranpa modukoak izaten dira partidu hauek. Sailkapeneko azkena izan arren, partidua irabazi egin behar da. Askotan, aurkariaren intentsitate baxuak zeuri ere eragiten dizu, baina gu ez gara hor erori. Presiorik gabe, aurkari arriskutsua izan zitekeen, baina azkar hautsi dugu partidua eta, gainera, ez dugu golik jaso. Aukera gehiago ere egin ditugu, baina ez dira sartu. Ez da gure partidurik onena izan, egia esanda, baina hiru puntuak etxean geratu dira", azaldu du Mikel Aristik, Bergarako entrenatzaileak.
Erregional Ohorezko Mailako beste bi partiduei dagokienez, Aretxabaletak 1-0 irabazi dio Oiartzuni, eta Mondrak, berriz, bana berdindu du Lesakan, Beti Gazteren aurka.
Maila bat beherago, Erregional Preferentean, Aloña Mendi 1-2 nagusitu zen Zumaian, eta Antzuolak ere garaipena lortu zuen Ilintxaren aurka (3-1).