Lehenengo zati traketsa jokatu du Soraluze BKEk; erasoan ez dute asmatu eta jokoan geldo. "Piboteekin jokatzen obsesionatu gara eta arazoak izan ditugu aurkariak gainditzeko", zioen bukaeran Josetxo Muniategi entrenatzaileak. Hala, markagailuan 8 eta 11 zela iritsi dira atsedenaldira.
Bigarren zatian piboteekin jokatu behar hori ahaztu egin dute, eta erasoan errazago moldatu dira. Hala ere markagailuan harrapatzea kosta egin zaie; hamazazpinako berdinketarekin iritsi da hori. Jokalarien gorpuzkera handia aprobetxatu dute Donibaneko jaurtitzaileek, eta bergararrak horretara egokitu behar izan dira.
Partidu amaieran 24 eta 21, eta Muniategik puntuak eskuratzearen garrantzia azpimarratu du: "Azken minutuetan ere partidua korapilatu egin da baina garrantzitsuena da puntuak etxean geratu izana".