Mozioak eskatzen du, besteak beste, urrunketaren amaiera: "Bergarako Udalak bere desadostasuna adierazten du pertsona presoen urrunketa dakarren eta salbuespeneko isolamendu neurriak jasotzen dituen kartzela politikarekin. Espetxe politika berria behar da eta presoek familia erroetatik ahalik eta gertuen egon behar dute Euskal Herriko espetxeetan".
Gure Artera-Sare-ren izenean hitz egin zuen Aittor Arantzabalek eta udalbatzari eskerrak eman zizkion mozioa aho batez onartzeagatik: "Espetxe politika hau behin betiko amaitzea lortu behar dugu, denon artean. Adostasuna lortzeko jarraitu dugun lan ildoak aukerak ematen dizkigu etorkizunera begira ate berriak irekitzeko".
Elena Lete alkateak nabarmendu zuen "lanketa handia" egin dela Gure Artera-Sare-rekin mozio honen bueltan eta "adostasun maila altua" lortu dela adierazi. "Egon dira puntu batzuk adostasuna ez duguna lortu eta horregatik aipatu dut min guztien aitortza izan beharko litzatekeela abiapuntua".
Diru-laguntza lerroak, eztabaida iturri
Urteko lehen osoko bilkurako eztabaida gai nagusia 2019tik 2021era arteko diru-laguntzen plan estrategikoa izan zen. EAJren eta PSE-EEren aldeko botoekin onartu zen, EH Bildu eta Irabazi abstenitu ostean. EAJren eta EH Bilduren artean eman zen eztabaida. Oposizioko talde nagusiak salatu zuen, besteak beste, lanketarik egin gabe eta adostasunetara heltzeko borondaterik gabe diru-laguntza lerroak bozkatzera eraman izana. EAJk dio plana dinamikoa eta arina dela eta lerroz lerro aldaketak egiteko aukerak badaudela.