Goiko postuei begira dagoen Urnieta hartu zuen mendean atzo, Labegaraietan, Soraluce Bergarak. "Defentsako lan ona egiteak konfiantza ematen dizu eta atzo bereziki ibili ginen ondo arlo horretan. Amaieran, kontraerasoan, min handia egin genien", adierazi du, "oso pozik", Josetxo Muniategik. Lehen itzulia ederto amaitu dute mahoneroek, aprobetxatu beharreko bolada onean.
Hala ere, Urnieta hobeto hasi zen, kanpokoenak izan ziren lehen 20 minutuak. Hain justu 20. minutuaren bueltan, epaileak Bergarako bi jokalari bi minutuz kanporatu zuenean, aurretik jarri ziren kanpokoak; gutxira, baina, etxekoak suspertu eta hortik aurrera kontrolpean izan zuten lehia.
Bigarren garaipena da jarraian eta oraingoan ere defentsako lan ona izan da gakoa. "Erasoan ez dugu maila bereziki ona duen jokalaririk; horregatik, defentsan ondo aritzea ezinbestekoa da guretzat. Ea bide honetatik jarraitzen dugun", dio Muniategik.