Aste bukaera honetan izango da zer ikusi Bergarako Udal Pilotalekuan. Gaur, egubakoitza, hiru norgehiagoka jokatuko dira, 19:30ean hasita. Lehenengo biak emakume pilotari txapelketako bigarren mailakoak izango dira eta kantxan ariko dira nor bere bikotekidearekin Arrate Bergara eta Uxue Zubizarreta pilotari bergararrak. Zubizarretak Badiola du bikotekide eta Bergarak, Bikario. Hirugarren partidua eskuz banakako gizonezkoen txapelketakoa izango da eta herriko Eneko Muguruzak jokatuko du. Murua da titularra, baina Muguruzak jokatuko du Urbietaren kontra.
Biharko, zapatua, benjaminen eskolarteko txapelketako sei partida daude iragarrita. 16:30ean hasita, Bergarako, Antzuolako eta Oñatiko pilotariak ariko dira nor baino nor gehiago.
Domekan, berriz, gaztetxoagoen txanda izango da; izan ere, 2012an, 2008an eta 2007an jaiotakoen Gabonetako Txapelketako norgehiagokak jokatuko dira frontoian, 10:00etan hasita.