Sarrera guztiak agortu ziren, ikusmina zegoen, hortaz, aspaldi Bilbon bizi den herriko aktorearen bizipenak oinarri dituen antzezlana ikusteko. "Familiakoak eta lagunak etortzekoak zirela banekien, ez nuen uste baina, horren gertukoak ez diren hainbeste lagun etorriko zenik, poztekoa da! Komedia arloan jardun izan dut gehienbat, hortaz, hasieran nahiko harrituta ikusten nuen publikoa, nire kontu intimoagoak serioago kontatzen ari nintzelako, bukatutakoan, baina, eskainitakoa gustukoa izan zela adierazi zidaten askok", kontatu du Borobiak.
Etxean berezia egin guran
Borobia bera da antzezlanaren egile, ekoizlea eta aktore nagusia, baina agertokian lagun izan zituen Sara Berrueta eta Josu Angulo aktoreak. Era berean, zuzeneko musikak pisu handia duen lana da Punkowsky, hori horrela, beste emanaldietan izaten dituen moduan, alboan izan zituen Bergarakoak Jon Fresko (Ken 7, Gatibu) bateria-jolea eta Naiel Ibarrola teklatu-jolea, eta baita Bergarako What A Band taldeko kideak. "Herrian izanik, zerbait berezia egin nahi nuen, eta lagun ditudan Aitor Aldanondo eta Txus Martinez gonbidatu nituen; What A Band taldeak aspaldi zuen Seminarixoan jotzeko gogoa, eta atzo izan zuten, bada, taularen gaina zapaltzeko aukera. Asko gustatu zitzaidan Seminarixoa, oso ondo dago, eta bertako langileei eskertuko gura nieke euren prestutasuna eta laguntasuna. Hurrengoan ere gustura etorriko naiz".