Tenporak 'Itzulika' diskoa aurkeztuko du zapatuan Seminarixoan

Tenpora osatzen duen boskotea.
Tenpora taldeak estudioko bigarren disko luzea aurkeztuko du zapatuan Bergarako Seminarixoa aretoan (19:00): Itzulika. Sorkuntza berriko bederatzi kantu eta bertsio batek –Imanol Larzabalen Zure tristura kantuak– osatzen dute autoekoiztutako argitalpena, eta errefuxiatuen inguruko trilogia batek ixten du diskoa: Lesbos, Lampedusa, eta Argiak itzali.

Kantuak pop eta jazz artean sortu, eta elektronika eta rock progresiboa bezalako eremuetan nahastu dituzte. Diskoa Beasaingo Pottoko estudioan grabatu dute, Fredi Pelaez musikari eta soinu teknikariarekin, eta Hasier Oleaga (bateria), Itsaso Etxebeste (baxua), Beñat Barandiaran (gitarra), Juantxo Zeberio (teklatuak) y Elene Arandia (ahotsa) osatutako boskoteak Karlos Linazasoro eta Harkaitz Cano idazleen elkarlana izan du berriz ere kantuen hitzetan.

Eskarmentu handiko taldea

Tenpora taldea ibilbide luzeko bost musikarik osatzen dute (Ruper Ordorika, Benito Lertxundi, Katamalo, Maddi Oihenart...). 2013ko martxoan elkartu ziren lehen aldiz, eta talde soinu sendoaren bilaketa-prozesua abian jartzeko asmoz argitaratutako maketa eta lehen diskoa plazaratu ondoren (Mundu berria, 2015), bigarren lanean dagoeneko heldutasuna atzeman izango da euren musikan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.