Seminarixoa beteta Izaroren ahots goxoa gertutik sentitzeko

Ikusmin handia piztu zuen Izaro abeslariaren zuzenekoak, eta antzoki berria goraino bete zen atzo iluntzean. Disko berriko eta zaharragoko kantuak eskaini zituen, eta ikusleak hotz hasi ziren arren, amaieran poltsikoan sartzea lortu zuen. La felicidad kantuarekin agurtu zen, Seminarixoko ikusleak gehiago entzuteko gosez utzita. 

Easo disko berriko aurkezpen biraren amaieran, Bergarako Seminarixoa bisitatu zuen atzo Izarok. Bergarar asko zegoen ikusleen artean, baina baita kanpotik etorritako lagunak ere.

Lehen bi kantuetan publikoa hotz xamar hasi zen, baina pixkanaka berotuz joan ziren, eta amaieran koruak abestu zituzten Izarok eta ikusleek elkarrekin. Kantariak parte hartzeko eskatu zien, eta ikusleek ez zuten hutsik egin. 

Abeslariak aipatu zuen Seminarixoa areto "polita eta txukuna" dela, eta aretoaren akustika primeran egokitu zen bere ahots goxora. Ordu eta laurden inguru iraun zuen zuzenekoak, eta amaieran ikusle zein artista, denak gustura. Ikusleak kanta gehiago entzuteko gosez geratu ziren, baina hori musikarien hizkuntzan seinale paregabea ei da. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.