Beste urte betez, Bergarako kartzela zaharrean ospatuko dute bihar, Gaba Beltza. Antolakuntzak hau adierazi du: "Legenardun (leproso) gisa Bergaran Erdi Aroan bizi zen pertsonaia bat hartu dugu; legenarra harrapatu, eta hil egin zen. Pertsonaia hau mamu moduan agertuko da eta Bergarako alde zaharreko kontakizunak kontatuko dizkigu". Bisita gidatu antzeztua amaitu ostean, "beldurrezko eta fantasiazko film labur saio golfoari" emango diote hasiera. Horren ostean, eta Gaba Beltzari jarraipena emateko asmoz, mozorro festa hasiko da. DJ Wolf-Framiok eta beste munstro batzuek alaituko dute kartzela zaharra; beraz, musikarik ez da faltako. Herritarrak mozorrotuta joatea nahi dute antolatzaileek, eta baita arima txarrak uxatu eta ondo pasatzea ere.