Bikote bat atxilotuta, Bergarako etxebizitza batean lapurtzea leporatuta

Deba-Urolako Ertzain-Etxeko agenteek gizonezko bat eta emakumezko bat atxilotu dituzte, joan den astean Bergarako etxebizitza batean lapurtu izana egotzita. Ertzaintzak jakinarazi duenez, jabeak oporretan zeudela baliatuta, ustezko lapurrek atea bortxatu eta hainbat gauza lapurtu zituzten –balioko zenbait objektu etxebizitzaren barruan, eta ibilgailu bat garajean–.

Bi susmagarriak identifikatu, eta lapurtutako hainbat objektu eta autoa berreskuratu ahal izan zituen Ertzaintzak.

Lapurreta joan den astean gertatu zen, Bergarako familia bakarreko etxebizitza batean. "Jabeak oporretan zeudela baliatuta, lapurrek atea bortxatu eta etxebizitza garbitu zuten. Besteak beste, balioko objektu batzuk –dirua, etxetresna elektrikoak eta aparatu elektronikoak– eta garajean zegoen auto bat lapurtu zituzten".

Jabeen salaketa jaso ondoren, agenteak ikertzen hasi ziren, bi susmagarriak identifikatzeko asmoz. "Ikerketei esker, lapurtutakoaren zati bat aurkitu ahal izan zuen Ertzaintzak, Gasteizko bigarren eskuko gauzen salerosketa-denda batean saldu ondoren". Halaber, lapurtutako autoa ere aurkitu zuten Legutioko udal-mugartean. "Lapurrek bertan utzi zuten abandonatuta, barruan etxebizitzan lapurtutako hainbat etxetresna elektriko eta aparatu zituela".

Biak bergararrak

Azkenik, ikerketa-agenteek ustezko lapurrak identifikatu zituzten. Bata 34 urteko gizonezkoa da, eta bestea 26 urteko emakumezkoa, biak Bergarako biztanleak. Haien bizilekuan atxilotu zituzten.

Atxilotuak polizia-bulegoetara eraman zituzten bidezko eginbideak egiteko, eta, eginbideak amaitu ondoren, epailearen esku jarriko dira.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.