Neskak futbolera erakartzeko topaketa egingo dute domeka goizean Agorrosinen

Jokin Bereziartua Lizarazu 2018ko mai. 25a, 11:15
Agerraldia egin dute Agorrosinen, domekako topaketa iragartzeko.

Agorrosin futbol zelaian elkartuko dira domeka goizean neskak futbolera erakartzen jarraitzeko. Denboraldi honetan 105 neska aritu dira, bost taldetan banatuta, eta BKEko futbol saileko zuzendaritza "oso pozik" dago orain arteko lanarekin. Hala ere, diotenez, bide luzea dago egiteko.

Bergara Kirol Elkarteko futbol sailak nesken futbolaren alde egindako apustua berretsi eta neska gehiago erakarri gura ditu hurrengo denboraldiari begira. "Iazko erronka izan zen 100 nesketara heltzea eta dagoeneko kopuru hori gainditu egin dugu. Zehazki esateko, 105 neska aritu dira aurten gurean. Bailara moduan ez dago klubik halako zenbakirik duenik eta Gipuzkoa mailan ere erreferente izateko bidean gaude. Oso-oso pozik gaude", adierazi du BKEko presidente Iosu Elorzak.

Duela hiru urte zuzendaritza berria sartu zenetik lehentasunen artean kokatu zuten nesken futbolari "merezitako bultzada" ematea: "Bi talderekin hasi ginen eta hiru urtean bost talde izatera pasatu gara". Familia handitzen jarraitzea da domekarako Agorrosinen prestatu duten topaketaren helburua. Udalak ere begi onez ikusten du BKEren apustua. "Lanean gabiltza, baina bide luzea dugu egiteko kirol elkarteekin batera; BKEk bere kabuz egin duen lanketa oso positiboa eta beharrezkoa da", uste du Berdintasun zinegotzi Maite Agirrek.

Mahonero Eguneko zozketa

Ekainaren 23an ospatuko dute Mahonero Eguna, hirugarren urtez jarraian, talde guztiak ospakizun giroan batzeko. Egun horretan egingo dute Aspanogi haur minbizidunen guraso elkartearen aldeko zozketa; Aspanogirendako 10.000 euro lortzeko erronka zehaztu dute.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak