Errenta aitorpena euskaraz egiteko kanpaina abiatu du Bergarako Udalak

2017ko Errenta aitorpena egiteko epea zabalik dago dagoeneko eta ekainaren 30ean amaituko da kanpaina. Bergarako Udalak herritarrak animatu nahi ditu aitorpena euskaraz egitera: "Errenta aitorpena euskaraz; euskarari bide berriak ireki eta administrazioa euskalduntzeko".

Bergarako Udalak jakinarazi duenez azkenengo urteetan gora egin du errenta aitorpena euskaraz egin duten herritarren kopuruak, baina oraindik ere datu hobetu daitekeela uste du Udalak.

Gipuzkoako Foru Aldundiaren azken datuen arabera, 2015eko errenta aitorpena Bergarako bizilagunen %25ak euskaraz egin zuen. Aurtengoan ere, kopuru hau hazteko erronka hartuz, oraindik pausoa ematera animatu ez diren bergararrak erretan euskaraz egitera gonbidatzen ditu Udalak. Era horretan, euskarari bide berriak irekitzeaz gain, administrazioaren euskalduntzea ere bultzatzen da.

Errenta aitorpena egiteko hiru modu daude eta guztietan erabili daiteke euskara:

1. Mekanizatua:
- Hitzordua hartzerakoan, adieraz ezazu Ogasunarekin harremanak euskaraz izan nahi dituzula.
- Ogasunarekin aurrez aurreko harremanak edo telefono edo internet bidezkoak euskaraz izan ditzakezu, horrela eskatzen baduzu.
- Ogasunak sinatzeko ematen dizun orria ere euskaraz jaso dezakezu.

2. Autolikidazio-proposamena:
- Jasotako proposamena onartzerakoan, euskaraz egin nahi duzula esan, eta aurrerantzean Ogasunak agiriak euskaraz bidaliko dizkizu.

3. Internet bidezkoa:
- Errenta-programa euskarazko bertsioan jaitsi internetetik, eta hobetsitako hizkuntzaren atalean euskara aukeratu.
- Aholkularitzaren bat aukeratzen baduzu, espresuki adierazi beharko duzu aitorpena euskaraz egin nahi duzula.

Informazio gehiago: Gipuzkoako Foru Aldundia edo 902 100 040 telefonora deituta. Baita Bergarako Ogasun bulegoan ere.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.