Alokairu soziala jasotzeko ezinbestekoa izango da 18 eta 30 urte arteko adina izatea, Bergaran erroldatuta egotea, eskatzaile edo bizikidetza-unitateko kideetatik inork ez izatea jabetzan etxerik, eta eskatzailearen diru sarrerak urtean 7.455 eta 28.000 euro gordin artean izatea, besteak beste. Laguntza eskatzeko gazteak eskaera aurkeztu beharko du Gizarte Zerbitzuetan.
100 eta 250 euro arteko laguntza
Gizarte Zerbitzuetan dokumentazioa gainbegiratuko dute eta ondo balego Hirigintzara bideratzen dute sail honek etxearen baldintzak ikuskatzeko eta kontu-hartzailetzara arlo ekonomikoa egiaztatzeko. Horiek guztiak betez gero, laguntza emango zaio. Alokairua gehienez 500 eurokoa izan beharko da, eta Udalak eskatzaileari 100 eta 250 euro arteko laguntza emango dio.
Aurten, urtarriletik hasita
Laguntza berezi hau 2017ko ekainaren 20an jarri zen indarrean eta 2017an hamaika eskaera jaso ziren; zortzi onartu ziren, bat ezeztatu eta bi ebazteko zain daude. Udalak laguntza urtarriletik abiatu du aurten; iaz eskatu zutenek berriro eskatu behar dute.