Ernai erakundeko zazpi kideren eta Topatu.info-ko kazetari baten kontra Espainiako Auzitegi Nazionalean 2015eko maiatzean egindako epaiketa batean 50 lagunek egindako ekintza desordena delitutzat jo zuen Murillo epaileak. Herri harresi bat irudikatu zuten 50 gaztek –47 euskal herritar eta 3 madrildar–, hain zuzen ere. Atzo hasi eta bukatu zen epaiketa Madrilen eta gazteak sententziaren zain daude. Tartean, Iraitz Salegi, Ane Ruiz de Egino eta Ekaitz Aranberri debagoiendarrak.
Bakoitzarendako bost hilabeteko kartzela zigorra eskatzen du fiskalak. "Zigor eskaerak ez du heldulekurik, ekintza sinbolikoa izan zelako eta ez zuelako desordenik eragin. Gainera ezin dute frogatu 50 lagunak publiko moduan egon ginenik ala ez. Orain sententziaren zain gaude. Astebete barru edo hilabete barru jakingo dugu zein den, auskalo", azaldu du Iraitz Salegik.