Hondakinak batzeko guneko edukiontzi grisa eta marroia erre ziren, baita urdinaren zati bat eta edukiontziak inguratzen dituzten egur xaflak ere. Auzotarrak bizkor mugitu ziren sutea ikustean, eta suhiltzaileak etorri aurretik gainerako edukiontziak sutetik urrundu zituzten. Beraz, auzotarrak eta suhiltzaileen lan azkarrari esker, ez zen bestelako kalterik gertatu. Ondoan elektrizitate poste bat ere badago, baina hark ez zuen inolako kalterik izan.
Basurde hondakinak
Lekuko batek GOIENAri esan dio, sutearen ezustekoaz gain, harrituta ikusi zutela gune berean basurde baten hondakinak zeudela. Antza "norbaitek ehizatu, garbitu -jatekoak kendu-, eta gainerakoa, azala, tripak..., bertan utzi zituen", dio testiguak.
Gertatutakoa ikertzen
Udaltzaingoa gertatutako aztertzen ari da, baina momentuz ez dakite zer dela eta hasi zen sutea. Mankomunitateko teknikariak bertan izan dira gaur ingurua garbitzen, eta momentuz giltza gabeko edukiontzi grisa jarri dute atzo erretakoa ordezkatzeko.
