Estreinaldiz betetako eguna Bergarako Erraldoi Taldearentzat

Txomin Madina Milikua 2017ko abe. 17a, 18:59

Guti eta Felixin erraldoi txikien gomazko panpinak aurkeztu dituzte, eta taldearentzat Elgoibarko dultzaineroek sortu duten balsa ere dantzatu dute lehenengo aldiz herriko plazan.

Bergarako Erraldoien Taldeko bi erraldoi txiki bihurriek, Guti-k eta Felixin-ek, badute dagoeneko euren gomazko panpina. Udaletxeko osoko bilkuren aretoan egindako ekitaldian aurkeztu dituzte panpinok, eta ekitaldira kalejiran joan dira Zabalotegin duten lokaletik Erraldoi Taldekoak.

Aurkezpenak interesa piztu du herritarren artean, eta aretoa goraino bete da. Bertan, Luis Mari Gutierrez Guti-k eta Felix Iñiguez de Heredia Felixin-ek, panpina bana jaso dute herritarren txalo artean. Baita Elena Lete alkateak, Bergarako herriaren izenean, eta Elgoibarko dultzaineroek ere.

Izan ere, gaur ez dituzte panpinak bakarrik aurkeztu. Erraldoi Taldeari musikarekin laguntzen dioten Elgoibarko dultzainero taldeko Txominek, Aitorrek eta Rikardok, bals bat, 'Guti' eta Felixin'-en balsa izenekoa sortu dute Bergarako konpartsarentzat, eta berau ere estreinatu dute gaur goizean, San Martin plazan egindako dantzaldian. Balsa egiteko ideia duela hilabete gutxi sortu zen, Orduñara egin zuten irteera bateko bazkarian, eta lehen zirriborroa idatzi zeneko papera ere oparitu diete dultzaineroei Eta hauek era berean, partituraren kopia bat eman diete Felixin-i, Guti-ri eta konpartsakoei.

Dagoeneko salgai

Gomazko panpina berriak eskuragarri daude dagoeneko, 25 euroren truke, Raizabal, Mujika eta Larrañaga gozotegietan eta Gorka harategian.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.