Osintxuar baten gorpua atera dute ibaitik Soraluzen

Suhilltzaileak garabiarekin gorpua ateratzen.

Herritar batek eman du abisua gaur 14:00ak aldera Soraluzeko Sapa ondoko presaren ondoren gorpu bat zegoela trabatuta. Suhiltzaileek atera dute garabi baten laguntzarekin 15:30ak aldera eta 76 urteko Osintxuko gizonezkoa dela adierazi berri dute Segurtasun Sailetik. (Argazkia: Plaentxia.eus)

Egunetan falta zen osintxuar hori etxetik. Segurtasun Sailetik esandakoaren arabera gorpuak ez zuen ageriko indarkeria zantzurik. Autopsia egitera eraman dute.

Luze joan da ibaitik ateratzea

Lekuko baten arabera kiroldegi paretik behera joan da hildakoa, harik eta Sapa ondoko presa jaitsi eta trabatuta geratu den arte. Bi suhiltzaile jaitsi dira ibaira, garabi baten laguntzarekin gorpua zegoen tokiraino, ibaiaren erdialdera, eta kontu handiz bazterreratu dute. Luze joan da prozesua, pare bat bider jaitsi dira suhiltzaileak bertaraino, eta bigarren saiakeran atera dute kanpora. Gero esku-ohe bat erabilita ibai bazterreraino eroan dute. 17:00etan oraindik bertan zegoen auzitegiko medikuaren zain. 

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.