Bergarar talde polita elkartu da gaur eguerdian Irala kalean Euskaraldiaren aurkezpen ekitaldia egiteko. Azaldu dute 2018an Euskal Herri mailan egiteko den ekimenean parte hartzeko gertu daudela, eta herritarrei parte hartzeko eskatu diete.
Euskaraldia 2018ko azaroaren 23tik abenduaren 3ra bitartean egingo da. Ahobiziak eta belarriprestak behar dira hamaika eguneko epe horretan euskaraz jarduteko konpromisoa hartuko dutenak. Lehenengoak euskaraz berba eginez, eta bigarrengoak euskaraz berba egiteko gauza ez badira ere informazioa euskaraz jaso eta erantzuna beste hizkuntza batean emateko gertu egonda.
Ekimenean parte hartuko duten herritarrei paparrean ipintzeko pegatinak banatuko zaizkie kide direla argi adierazteko. Horretara heldu aurretik, ordea, sentsibilizazio eta zabalkunde lan handia egingo dute Bergaran. Helburua da ahalik eta herritar kopuru handienak parte hartzea Euskaraldian.
Egoera bitxiak
Euskaraldiarekin zer nolako eragina lortu nahi den adierazteko hiru egoera antzeztu dituzte gaurko aurkezpen ekitaldian. Neska-mutikoei euskaraz baina beraien artean gazteleraz berba egiten duten bi gurasoren egoera, euskaraz hitz egiteko gauza ez izanda ere ulertzeko gai den pertsona baten egoera, eta parean duen tabernaria ezezaguna duelako lehenengo hitza gazteleraz egiten duen lagun batek egoera. Noski, tabernaria euskalduna da. Pegatinek lagunduko dute ahobiziak zein belarriprestak idenfitikatzen, eta horrek hizkuntza ohitura aldaketa esanguratsuak ekar ditzakeela uste dute Euskaraldiaren bultzatzaileek.
Izen-ematea uda ostean
Azaldu dute uda ostean hasiko direla izen-emate kanpainarekin, Bergaran. Aurretik hainbat sentsibilizazio kanpaina eta ekimen egingo dituztela ere adierazi dute. Hain zuzen ere, gaurkoa izan da lehenengoa.
Ekitaldian Bergarako hainbat talde eta elkarteko ordezkariak hartu dute parte. Euskaraldiari sostengua emateko talde argazkia ere atera dute.
