Zapore "gazia", gorabidearen ostean

Soraluce BKE eskubaloi taldeak ezin izan ditu bi puntuak erdietsi; 23-23 adierazten zuen markagailuak partidu bukaeran. Leizaranen bisita izan dute.

Gorabideak ez du zertan gailurrean bukatu. Bada, hori gertatu zaie bergararrei. Defentsan makal hasi dute partidua, eta kanpokoek jakin dute aukera aprobetxatzen. Hasierako minutuetan bost goleko errenta lortu dute andoaindarrek: 5-10. Defentsan sufritzen zebilen Bergarako taldea, eta horretan zeresana zuen Leizaranen ezker hegaleko jokalariak. "Hasierako minutuetan ez dugu jokalariaren jokoa gelditzen jakin. Kanpoko jaurtiketa ugari egin ditu; barrura joan dira gehienak", azaldu du Josetxo Muniategik, eskubaloi saileko arduradunak. Partiduaren gidoiak bere horretan segi du atsedenaldira bitartean; 14-10 bukatu dute lehen zatia.

Argi zegoen zer zen aldatu beharrekoa; alegia, partidua irauli gura bazuten, defentsa gogor batekin hasi behar zuten bigarren zatia. Eta atsedenaldiko berbaldiak izan du eraginik. Ordutik aurrera bestelakoa izan da panorama; golik jasotzen ez bada, aurkariak ezin baitezake ihes egin. Gauzak horrela, hemezortzina berdintzea lortu dute etxekoek.

Defentsak defentsa, bide beretik segi dute osteko minutuetan, eta aurretik jartzea lortu dute: 20-18. Bestelakoa zen gidoia, parean ziharduten bi taldeek. Modu horretan, partidua bukatzeko minutu bat falta zenean, berdinketa adierazten zuen markagailuak. Eta etxekoentzat zen azken erasoa; ez dute golik egin, ordea. Horrenbestez, berdinketarekin amaitu dute norgehiagoka: 23-23.

Gauzak horrela, zapore "gaziz" bukatu dute partidua bergararrek. "Sekulako ahaleginak egin ditugu partidua iraultzeko, eta gertu ikusi dugu garaipena. Azken gol hori falta izan zaigu", esan du Muniategik. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.