Dolmenen ibilbidea ezagutzeko azken aukera domekan

Dolmenen ibilbideko irteera bat.

Dolmenen Ibilbidearen balio arkeologikoa eta geologikoa zein paisaia-balioa ezagutzera emateko azken bisita gidatua egingo da domeka honetan, urriak 8, 10:00etan, Karakateko aparkalekutik abiatuta. Parte hartzeko aurrez eman behar da izena 657 79 46 77 telefono zenbakira deituta edo info@begi-bistan.com helbidera idatzita.

Joan den ekainean abiatu zituzten Soraluzeko, Elgoibarko eta Bergarako Udalek, Debegesa garapen agentziarekin batera, Dolmenen Ibilbidea ezagutarazteko bisita gidatuak. Orain arte zortzi irteera egin dira eta ehundik gora lagunek hartu du parte. Domekakoa bederatzigarren irteera izango da. 10:00etan hasiko da, Karakateko aparkalekutik abiatuta. Oraingo honetan bisita gidatua euskaraz izango da.

Arropa erosoa eta mendiko oinetakoak

Soraluze, Elgoibar eta Bergarako udalerriak lotzen ditu Dolmenen Ibilbideak eta balio arkeologiko handia du; bertan Neolitoko eta Brontze Aroko tumuluak eta trikuharriak aurkitzen dira. Antzinako giza taldeek horrelako mendilerroak, paisaiaren mugarri nagusi zirenak, aukeratu zituzten hildakoak ehorzteko eta beren lurraldea seinalatzeko. Monumentu megalitikoen bidez utzi diguten ondarea antzinako ehorzte-errituekin lotuta dago. Bederatzi kilometroko ibilbidea egingo dute, Karakate eta Irukurutzeta artean. Ibilaldian parte hartuko dutenei gomendatzen zaie arropa erosoa eta mendiko oinetakoak eramatea. Ibilbidearen amaieran parte-hartzaileek gazta, ogia eta sagardoa dastatzeko aukera izango dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.