Udazkeneko joeren berri izateko moda erakustaldia, urriaren 21ean

Moda erakustaldiaren aurkezpena gaur, Fraiskozuri plazako monolitoan.

Bergarako Udalaren eta Bedelkar elkartearen lankidetzaren emaitza moduan jaio zen Bergara Bizi egitasmoaren barruan, moda erakustaldi berri bat antolatu dute urriaren 21erako; frontoian izango da, 22:00etan. Erakustaldian 100 herritar inguruk hartuko dute parte eta Goiena telebistak zuzenean emitituko du. Sarrerak urriaren 17an jarriko dituzte salgai, bost eurotan.

2014an egin zen lehen desfilea, San Martin plazan, eta ordutik erakustaldi ezberdinak egin izan dira. Bedelkarreko Ainhoa Garitanoren arabera, jende asko dago erakustaldi horren atzetik eta gaineratu du udazkenekoa dela, bere ustez, erakustaldi politena: "Udazken eta neguko arropak eta osagarriak erakutsiko ditugu; jendeari animatu gura diot etortzera, nire ustez politena da. Sorpresa gehien eskaintzen dituena da", gaineratu du. Desfilearen filosofia ere nabarmendu du Garitanok: "Bergaran bizi eta erosi nahi dugu".

25 denda

25 denda izango dira parte hartuko dutenak: hamabi arropa denda, hiru oinetako denda, umeen arropa duten bi denda, hiru estetika zentro, bi ile-apaindegi, optika zentro bat, lentzeria denda bat eta kirol denda bat.

Sarrerak nola eskuratu

Esandako moduan, sarrerak urriaren 17an jarriko dituzte salgai bost eurotan. Internetez, hemenedo udaletxeko sarreran erosi ahalko dira, 18:00etatik 20:00etara. Elbarrituek telefonoz erreserbatu ahalko dituzte sarrerak 943 77 91 59 telefono zenbakira deituta. Izen-abizenak, Nortasun Agiria eta telefono zenbakia eman beharko dute eta egunean bertan frontoiko leihatilan eskuratuko ahalko dituzte sarrerak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.