Lehiaketa Udalak antolatu du Arizondo argazkizale elkartearen laguntzarekin, eta Euskadin bizi den edozein afizionatuk parte hartu ahalko du. Gaia kirol ekintzen ingurukoa da, zuri-beltz zein koloretako argazkiak aurkeztu ahal izango dira eta gehienez mota bakoitzeko lau lan aurkez daitezke, betiere 40x50 zentimetroko kartulinan aurkeztuta. Lanen atzealdean titulua, egilearen izen-abizenak, bizilekua, telefonoa eta posta elektronikoa jarri beharko dira.
Esandako moduan, argazkiak aurkezteko azken eguna urriaren 11 izango da eta interesatuek argazkiak Udaletxera eraman edo posta zertifikatuz bidali ahal izango dituzte: Bergarako Udala. Agorrosingo Kirol Gunea (Argazki Lehiaketa). Boni Laskurain 21. 20.570 Bergara.
Sari ederrak
Zortzi sari banatuko dira guztira, bi kategoriatan (zuri-beltz eta kolorea) banatuta: lehen saria, 210 euro eta trofeoa; bigarren saria, 180 euro eta garaikurra; hirugarren saria 150 euro eta garaikurra; herriko onena: 120 euro eta garaikurra. Erabakia urriaren 14an hartuko da eta aukeratutakoak Aroztegi Aretoan egongo dira ikusgai urriaren 20tik 29ra bitartean. Argazkiak itzuliko dira erakusketa itxi eta ondorengo 30 egunetan.