Zetazeoak eta itsas hegaztiak ikusteko aukera Laboratorium-aren eskutik

Baleak ere ikusteko aukera ere egon daitekeela diote adituek. Argazkia: Verballenas.

Bergarako Laboratorium museoak zetazeoak eta itsas hegaztiak ikusteko irteera antolatu du azaroaren 4rako. 12 urtetik gorakoei zuzenduta dago eta Santurtziko portutik irtenda Kantauri itsasoan zortzi bat orduko ibilbidea egingo dute, bi adituk lagunduta. Plaza mugatuak direnez, izena ahalik eta lasterren ematea komeni da, 943 76 90 03 telefono zenbakian.

Irteeraren helburua da zetazeoak eta, aldi berean, itsas hegaztiak ikustea. "Eskarmentu handiko enpresa baten bitartez, aukera egongo da izurde mota desberdinak, katxaloteak, kalderoiak, rorcual borealak eta, agian, bale urdinak ere ikusteko", adierazi dute Udaletik.

Horrez gain, adituek diotenez, irteeraren data oso aproposa da albatrosaren gisako itsas hegazti bereziagoak ere ikusteko, hain justu migrazio lerroa Kantauritik pasatzen delako eta sasoi horretan hegazti asko mugituko direlako. Adituen arabera, "erabat ikusgarria" izan ohi da.

Prezioa: 70 euro

Irteeran parte hartzeko 70 euro ordaindu behar dira. Prezio barruan sartzen dira  Bergaratik Santurtzira joan-etorria egiteko autobusa eta zortzi orduko itsasontzi ibilaldia. Jana eta edana norberak eraman beharko du. Itsasontzian zetazeoak identifikatzeko gidak banatuko dira elebitan eta azalpenak emateko bi aditu izango dira; bata euskaraz arituko da eta bestea gaztelaniaz.

Azalpenak irteeraren bezperan

Irteeraren bezperan, azaroaren 3an, hitzaldia izango da Laboratorium Museoan, zer ikusi ahal izango den, zer eraman beharko den eta gaiari buruzko aurretiazko azalpenak emateko. Hitzaldi hori gaztelaniaz emango dute. Hitzaldiaren zein irteeraren ordutegiak laster emango dira jakitera.

Interesatuek Laboratorium Museoan eman beharko dute izena lehenbailehen, plazak mugatuak dira-eta. Informazio gehiago: 943 769003. Horrez gain, irteera egunerako itsaso txarra balego, beste data bat zehaztuko litzateke edo dirua bueltatu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.