Munibe Plaza esanguratsua da oso Ramon Arantzabalen azken urteetako lanean, eta oraingo erakusketan ere Bergarako txoko horrek izango du bere presentzia. Hain zuzen, hortik dator mostraren izena: Munibe blues.
Urtebete baino gehiagoz, plaza horretan hilabetero margolan desberdinak jarri ditu ikusgai Arantzabalek, erakusketa finko batean, eta orain, Nahikari tabernako erakusketan batuko ditu horietako gehienak, eguenetik aurrera ikusgai egongo den mostran. "Denbora honetan Muniben minutuz minutu bizi izan diren margolanak dira", dio artistak.
Nahikariko paretetan Muniben egondako lan luzeak eta motzak tartekatuta jarriko ditu Arantzabalek, eta horrez gain, bere beste lan batzuk ere ikusgai izango dira.
Hilabeteko epean izango da erakusketa hori bisitatzeko aukera.
