Urtero egin ohi dute halako irteeraren bat, Lokatzako zikloturistak batu eta elkarrekin goiz on bat pasatzeko asmotan. Lokatzako presidente Jon Unamunok azaldu duenez, klubean zikloturista dezente dauden arren, "nahiko sakabanatuta" ibili ohi dira, bakoitza bere ordutegien edo bere mailaren arabera, eta abar.
Hortaz, gustuko duten hori eginaz, bizikletan ibiliaz, lagunartean elkartzeko aitzakia da domekako irteera. Gainera, AEBtan dabilen Jokin Etxabe eta Murias taldeko Julen Irizar txirrindulari profesional bergararrak ere batuko dira hitzordura, biak ere Lokatzan aritutakoak baitira. Antzuolako txirrindulari amateurrek ere parte hartuko dute domekako hitzorduan.
