Pilotak gertu Rezusta eta Irribarriaren arteko finalerdirako

Irribarria eta Rezusta pilotekin Astelenan. Argazkia: Aspe.

Eibarko Astelena pilotalekua izan da Beñat Rezustaren eta Iker Irribarriaren pilota aukeraketaren lekuko gaur goizean, eta horixe izango da domekan, Buruz Buruko txapelketaren finalerdia hartuko duena ere. Biak ala biak gustura geratu dira aukeratutakoarekin.

"Materiala ona da; behar bada Irribarriak aukeratutakoak indartsuagoak dira baina ez dago aitzakiarik", esan du Rezustak. Onartu du entrenamenduetan eta baita lehen partiduan ere zalantzak izan zituela, baina orain "gusturago" dabil gertatzeko ere denbora gehiago izan duelako. Finalerdira iritsi izana "handia" dela adierazi du, ez zuelako uste horraino iritsiko zenik. Eta domekan ahalegindu behintzat egingo dela Irribarria estutzen jakinarazi du.

Irribarria ere gustura agertu da aukeratutako pilotekin, eta finalerdira "sentsazio onekin" iritsi dela adierazi du. Partidua berezia izango dela onartu du, gainera, une asko pasatu dituztelako bi pilotariek Eskuz Binakako txapelketan. Era berean, aitortu du Rezustak buruz burukoan dituen gaitasunetan beti izan duela konfiantza, "pilotari handia" delako.

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.