"Animaliak eduki eta babesteko ordenantzaren arabera, kalean edota lorategietan gorotzak uzten dituzten txakur jabeek 300 euro arteko isunak ordaindu beharko dituzte", azaldu du Bergarako Udalak ohar bidez.
"Kakak poltsan jaso behar dira, eta horretarako ezarritako edukiontzietara bota. Gogorarazi dute Bergaran badirela halako hainbat edukiontzi.
“Berdin du kaka non egiten den, kalean edo lorategian, kasu guztietan jaso behar da. Askotan lorategian izateagatik ez da jasotzen, desegin egiten dela pentsatuz. Baina horrek herritarren osasun eta segurtasunean izan ditzakeen ondorioak oso larriak izan daitezke. Horregatik, bergararrei arreta eta kolaborazioa eskatu nahi diegu”, gaineratu du Lander Arregi zinegotziak.
Gorotzen mapa
Jasotako kexei jarraiki, Bergarako Udalak "puntu beltzak" detektatu ditu eta mapa bat osatu du horiekin. "Mapa horretan garbi ikusten da txakur kaka ugari dagoela kale eta lorategietan eta horren aurrean neurriak hartzea erabaki dugu", dio Arregik.
