Bergarako Shotokan klubeko Krav Maga sailetik emakumeei zuzendutako autodefentsa ikastaroa antolatu dute zapaturako, hilak 11. 10:00etatik 13:00etara bitartean izango da.
Mintegi solidarioa izango da, eta hala, inskripzioa ez da ordaindu beharko, baina Elikagai Bankuari dohaintzan emateko elikagaiak ekartzeko eskatu dute antolatzaileek.
Shotokanetik azaldu dutenez, ikastaro honek emakumeei defentsarako lan-tresnak luzatzea du helburu, "ezagutza, trebetasun eta taktika berriak eta baliagarriak" lortze aldera. Horrez gain, baina, emakumeen "segurtasuna, erabakitasuna eta adorea" sustatu nahi dituzte, baita indarkeria motak eta erasotzaileak identifikatzeko baliabideak eskaini ere.