Hiru partidu aurreikusten ziren gaur goizerako. Baina, Aratusteak tarteko, bi bakarrik jokatu dituzte.
Udaberri txapelketako alebin mailakoa izan da lehena. Bergarako ordezkariek Goierri elkarteko Julen Armaolearen eta Oier Plazaolaren kontra neurtu dituzte indarrak, 16 tantotara. Partidua parekatua izan da. Hasieran Goierriko bikoteak hartu du abantaila (0-5). Baina, ostean, etxeko pilotariek hartu diote neurria lehiari eta ez dute hutsik egin.
Euskal Ligakoa
Munizipalean jokatu den bigarren partidua Euskal Ligakoa izan da. Ander Muruak eta Markel Gartziak partidu inportantea irabazi dute. Izan ere, Lemoako Martitegi-Aurrekoetxea bikoteari 22-12 irabazita, txapelketako finalerdia, etxean, Bergaran jokatzea lortu dute.
Lehia hori ere parekatua izan da hasierako tantoetan. 7-4 eta 8-7 aurreratu dira etxekoak. Muruak eta Gartziak partiduari neurria hartu dioten heinean, Lemoako bikoteak lekua eta indarrak galdu ditu. Norgehiagokaren bigarren zatian aise nagusitu da Bergarako bikotea.
