Bergara "gainbehera" doala dio Sortuk, eta horren erakusle jartzen du berriki EAJren eta PSE-EEren aldeko botoekin onartutako udal aurrekontua, beste inoren iritzirik kontuan hartu gabe aurrera ateratakoa, diotenez. Kritikatzen dute, adibidez, Arrizuriagan "proiektu bat egiteko aurrekonturik ere" ez dagoela. Herria "martxan" jartzeko "konpromiso zehatzak" proposatuko dituzte, Herri proiektua sortzeko.
Sortuk dio Bergarak Herri proiektua behar duela, "herrian konpartitua eta adostua", eta bi hilabete daramatzatela euren "oinarri sozialarekin" proposamen bat lantzen –dokumentua Arrano tabernan eskura daiteke–. Zapatuan aurkeztuko dute, 09:30ean Aranzadi ikastolan.
Bergara 2026, bizimodu ona egin, eragin izenekoarekin proposatuko dute konpromiso zehatzak "praktikara" eramatea; adibidez, "energia garbiaren alde", bultzada ematea "ehunka herritarrek" Goiener moduko egitasmoekin bat egiteko, eta ondoren Udalak eta enpresek. Zapatuko bilera orain arte landutakoa herritarrei azaltzeko da, Herri proiektua-k "guztion artean" egindakoa behar duelako, duten proposamena ez delako "aldatu ezin daitekeen totema".
