110 lagun inguru elkartu ziren atzo Bergarako San Juan auzoko ermitan La Jose artista madrildarrak emandako kontzertuan. Flamenko doinuak lantzen ditu batez ere La Josek, eta horiek izan ziren nagusi atzoko kontzertuan, baina bestelakorik ere eskaini zuen; esaterako, boleroak, fadoak eta erritmo sefardiak. Jose Luis Monton gitarra jolea eta Ivan Mellen perkusio jolea alboan zituela, entzuleak bereganatu zituen abeslariak, kanturen baten edo bestean parte hartzera ere gonbidatuz.
Musika eta kontzertuak auzoetara eramateko ekimenaren lehen saiakera izan zen atzokoa, eta Udalarekin batera emanaldia antolatu duen Obieta Auzo Elkarteko kide Jesus Agirreren esanetan erantzun ona izan du. Ez bakarrik auzotarren artean, izan ere autobusez edo autoz hainbat bergarar joan ziren kontzertura eta egon zen Arrasatetik joan zenik ere. “Jendea gustura geratu da, eta horrelako gehiago antolatzera ere animatu gaituzte”, dio Agirrek.