Arrano tabernako 3. binakako pilota txapelketaren finala jokatuko dute zapatuan, urriak 8, Udal Pilotalekuan. Oraingo edizio honetan ere, festa giroa jarriko dute finalaren bueltan, txapelketari bukaera borobila emateko asmoz.
Eguerdian hasita
Hala, 14:00etan bazkari herrikoia egingo dute Artatsen. Arranon eman dezakete izena joan nahi dutenek. Bazkalostean, berriz, 16:00etatik aurrera, DJ Keep_ak girotuko du partida aurrekoa Arrano tabernan.
18:30ean hasiko dira partiduak Udal Pilotalekuan. Lehenik eta behin, 3. eta 4. postuak erabakitzeko norgehiagoka jokatuko dute, eta bestelako sorpresak ere izango dira.Lehen partidu honetan Julen Aranburu-Ander Muruamendiaraz eta Humberto-Gallas bikoteak izango dira aurkariak.
Ondoren, 19:30 aldera, final handia jokatuko dute. Bertan, Gallastegi-Josu eta Ugarte-Irizar bikoteak izango dira aurrez aurre, txapela etxera nork eramango.
Bertsoak egubakoitzean
Horretaz gain, partiduaren bezperan, egubakoitzean, bertso saioa izango da Arrano tabernan, doan (22:30). Mikrofono aurrean arituko dira Ane Zuazubiskar arrasatearra, Unai Gaztelumendi eta Eli Pagola bertsolariak.
