Nesrine Belmokh abeslari eta biolontxelo-jotzaile frantziar-aljeriarra da hirukotearen arima. Adituen esanetan, haren urrezko ahotsa da guztiaren gainetik nabarmentzen dena. Hainbat hizkuntza beste menperatzen ditu askotariko musika estiloak. Frantsesez, arabiarrez eta ingelesez abestuta, bada, modu samurrean eta gozoan egiten du salto bluesetik jazzera, soulera eta baita frantziar kantuetara ere.
Sei urte zituela hasi zen abesten. Geroago, goi mailako biolontxelo-jotzaile bihurtu zen, orkestra askotan parte hartuta.
Puntako musikariak lagun
Belmokhen proiektu pertsonalena da NES, eta goi mailako profesionalekin osatu du taldea. Biolontxeloari soinu berezia eta oso pertsonala ateratzen trebea den Matthieu Saglio du, batetik, alboan, eta David Gadea perkusionista da hirugarren kidea. Gadeak ere nazioartean izen handia du eta askotariko artistekin lan egindakoa da: Sole Gimenezekin, Manu Tenoriorekin, Josemi Carmonarekin...