Giro paregabean igaro dute eguerdia San Juanen, jaietako egun handian

Jende mordoxka batu da San Juango plazan eguerdiko ekintzetarako (argazkiak: Lorea Larrañaga)

12:00etako mezarekin hasi dute gaurko egitaraua. Mokadutxoa izan dute ostean, eta lore sorta lehiaketako eta ortu txapelketako sariak banatu dituzte. Auzoko nagusiek, bestalde, merezitako omenaldia jaso dute.

Eguerdiko mezan batu dira hainbat eta hainbat auzotar bertako patroiaren egunean, San Joxepe abesbatzaren laguntzaz girotuta.

Elizatik ateratzean, txorizoa eta salda banatu dute, eta trikitilari eta pandero joleen musikaz lagunduta, jai giroan murgildu dira bete-betean.

Lore sorta eta ortu lehiaketa

Bosgarrenez, lore sorta lehiaketa antolatu dute aurten ere auzoan; nola ez, San Juan erramua izan da protagonista, antzinako sinesmenen arabera espiritu gaiztoak uxatzen laguntzen duena.

Irene Zenitagoia aditua arduratu da epaimahai lanak egiteaz, eta erabaki du Angiozarko Mertxe Altuberen lore sorta izan dela guztietan osatuena eta ederrena. Denera, 30 lore sorta aurkeztu dituzte gaurkoan.

Ortu lehiaketako irabazlearen izena ere gaur eman dute jakitera. Elortza baserriko Madalena Aranburuk jaso du saria. Aste honetan zehar epaileak baserriz baserri ibili dira baratzak begiratzen, eta gaur guztien argazkiak jarri dituzte ikusgai eliza aurrealdeko plazan.

Nagusiei omenaldia

San Juan eguna auzoko nagusiendako berezia izan ohi da, eta aurten ere hala izan da, noski. 80 urtetik gorako sanjuandarrei aurreskua dantzatu diete auzoko dantzari gazteek, omenaldi gisara. Gero, eguerdian, erretiratuek bazkaria izan dute Tartufo jatetxean.

Erlazionatuak

San Juan auzoko jaiak: eguerdiko giroa

Bergara

San Juan eguna primeran ospatu dute izen bereko auzoan. Meza, mokadutxoa, ortu lehiaketa, nagusiei omenaldia... denetarik izan da eguerdian zehar.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.