Gaueko hamarrak eta erdietan eman zioten su egun osoz plazan egon zen paper, kartoi eta bestelakoez osatutako menditxoari. Hala, egunean zehar zein gauez herritarrak urteko gauza txarrak edota eskolako apunteak bertara bota ahal izan zituzten, garretan kiskali zitezen.
Eguraldi onaz eta udako gauetako epeltasunaz lagunduta, gauerako plaza herritarrez bete-bete egin zen. Sua pizteaz bat, gonaz, alkandoraz eta kapelaz sorgin koadrila bat atera zen plazaren erdira, haren inguruan urteroko dantza egitera.
Horren ostean, hala nahi zuten herritar guztiak atera ziren polka dantzatzera, korro handia osatuz eta jai giroan guztiz murgilduta.
Sua txiki geratu zenean, zuzeneko musika lasaiaz eta kantu ezagunez gozatu ahal izan zuten bertaratutakoek.
