Liburutegiak hogei urte baino gehiago daramatza Osintxun. Orain, baina, horretaz arduratzen den pertsonaren lan jarduna bukatu egingo da, eta Udaleko kultura zinegotzi Maite Agirrek azaldu du momentu egokia iruditu zaiela auzokide eta eragileekin batera zerbitzua birpentsatu eta proposamenak jasotzeko. Osintxuarren aldetik ere eskaera hori jaso zutela azaldu du.
Hausnarketaren emaitzak
Liburutegiaren alde positiboak, alde negatiboak eta proposamen berriak zerrendatu zituzten. Positiboen artean, auzoan liburutegi zerbitzua izatea oso ondo baloratu zuten guztiek, baita bere baitan antolatutako ekintzak ere, umeen bisitak edota irakurketa kluba bezala.
Negatibotan, komunikazio falta nabarmendu zuten, jendeak liburutegian antolatzen direnen berri izan dezan eskatuz, eta Bergarako Udalarekin ere komunikazio zuzenagoaren falta aipatu zuten. Liburuak sarriago berritzea ere eskatu zuten, baita oporretan zenbait egunez gunea zabalik egotea ere, besteak beste.
Proposamenen artean, bizilagunak liburutegiko zerbitzua zabaltzearen alde agertu dira., eragileen elkargunea izan dadin eskatuz, eta liburuzain soila beharrean dinamizatzaile profila ere izango duen pertsona baten beharra azpimarratu zuten.